مرکزاطلاعات فلسطین
مقبوضہ مغربی کنارے میں بیت لحم کے مغرب میں واقع قصبے نحالین پر منگل کی شام قابض اسرائیلی فوج کے دھاوے کے بعد آنسو گیس کے باعث دم گھٹنے سے درجنوں فلسطینی متاثر ہو گئے ہیں۔ فلسطینی ذرائع نے اطلاع دی ہے کہ قابض فوج کی بھاری نفری نے قصبے کے وسطی علاقے میں پوزیشنیں سنبھال لیں اور نمازِ تراویح کی ادائیگی کے بعد مساجد سے نکلنے والے شہریوں پر زہریلی گیس کے گولوں اور صوتی بموں کی بوچھاڑ کر دی جس کے نتیجے میں دم گھٹنے سے درجنوں افراد بے ہوش ہو گئے۔
ذرائع نے مزید بتایا کہ قابض فوج کا یہ دھاوا مسلسل دوسرے دن بھی جاری ہے جس کے دوران سخت ترین اقدامات کیے گئے ہیں۔ ان اقدامات میں شہریوں کے گھروں پر چھاپے، تلاشی کی کارروائیاں، شہریوں اور ان کے شناختی کارڈز کی تصاویر بنانا، سڑکوں پر فوجی ناکے لگانا اور مقامی آبادی کی نقل و حرکت پر مکمل پابندی عائد کرنا شامل ہے۔ مغربی کنارے کے مختلف علاقوں میں قابض اسرائیلی فوج کے دھاووں اور گرفتاریوں کی رفتار میں نمایاں اضافہ دیکھا جا رہا ہے۔
