مرکزاطلاعات فلسطین
فلسطینی وزارت صحت نے اعلان کیا ہے کہ سات اکتوبر سنہ 2023ء سے غزہ کی پٹی پر جاری قابض اسرائیل کی مسلسل جارحیت کے نتیجے میں ہونے والی شہادتوں کی مجموعی تعداد 72,234 ہو گئی ہے جبکہ زخمیوں کی تعداد 171,852 تک جا پہنچی ہے۔
وزارت نے اپنی یومیہ رپورٹ میں واضح کیا ہے کہ گذشتہ 48 گھنٹوں کے دوران اور آج صبح نو بجے تک غزہ کی پٹی کے ہسپتالوں میں مزید 7 شہدا اور 13 زخمی لائے گئے ہیں، جو قابض اسرائیل کے جاری حملوں کا نشانہ بنے۔
وزارت صحت نے اس جانب اشارہ کیا ہے کہ متعدد متاثرین اب بھی ملبے تلے اور سڑکوں پر موجود ہیں، جبکہ میدانی حالات کی سنگینی اور بعض علاقوں میں مسلسل خطرات کے باعث ایمبولینس اور سول ڈیفنس کا عملہ ان تک پہنچنے سے قاصر ہے۔
بیان میں مزید بتایا گیا کہ سنہ 11 اکتوبر کو جنگ بندی کے اعلان کے بعد سے اب تک شہدا کی تعداد 658 اور زخمیوں کی تعداد 1,754 ہو چکی ہے، اس کے علاوہ ملبے کے نیچے سے 756 افراد کی لاشیں نکالی گئی ہیں۔
وزارت نے یہ بھی بتایا کہ مجموعی تعداد میں مزید 91 شہدا کا اضافہ کیا گیا ہے، جن کے ڈیٹا کی تکمیل کے بعد شہدا کی منظوری دینے والی کمیٹی نے انہیں سرکاری طور پر رجسٹر کر لیا ہے؛ یہ وہ افراد ہیں جو رواں ماہ سنہ مارچ کے آغاز سے اب تک شہید ہوئے ہیں۔
طبی عملہ اور سول ڈیفنس کی ٹیمیں غزہ کی پٹی کے مختلف علاقوں میں تلاش اور لاشیں نکالنے کی کارروائیاں جاری رکھے ہوئے ہیں، ایک ایسے وقت میں جب صحت کا پورا نظام شدید دباؤ اور طبی وسائل کی سخت قلت کا شکار ہے، کیونکہ قابض دشمن کی سفاکیت کے نتیجے میں طبی مراکز کو بڑے پیمانے پر تباہ کر دیا گیا ہے۔
