مرکزاطلاعات فلسطین
اسلامی تحریک مزاحمت ’حماس‘ کے ترجمان حازم قاسم نے اس امر کی تصدیق کی ہے کہ مجرم قابض صہیونی ریاست نے غزہ کی پٹی کے عوام کے خلاف ہولناک قتل عام کا ارتکاب کیا ہے۔ گذشتہ روز افطار سے کچھ دیر قبل شہر غزہ کے مغرب میں شہریوں کے ایک گروہ پر بمباری کی گئی جبکہ پیر کی علی الصبح توپ خانے کی گولہ باری کے ذریعے پناہ گزینوں کے خیموں کو نشانہ بنایا گیا جس کے نتیجے میں ایک خاتون صحافیہ سمیت تین فلسطینی خواتین شہید ہو گئیں۔ یہ کارروائیاں ایک خطرناک اشتعال انگیزی اور سیز فائر کے معاہدے کی کھلی اور سنگین خلاف ورزی ہیں۔
حازم قاسم نے اپنے اخباری بیان میں مزید کہا کہ قابض دشمن ایران اور لبنان کے خلاف جاری صہیونی امریکی جارحیت کی جانب دنیا کی توجہ مبذول ہونے کا بھرپور فائدہ اٹھا رہا ہے تاکہ غزہ کی پٹی میں قتل عام کے سلسلے کو تیز کیا جا سکے اور گزرگاہوں بالخصوص رفح گزرگاہ کو بند کر کے محاصرے کو مزید سخت کیا جا سکے۔
انہوں نے واضح کیا کہ قابض اسرائیل خطے پر اپنی جارحیت میں امریکہ کی جانب سے ملنے والی بے جا حمایت کو سیز فائر کی خلاف ورزی کرنے اور غزہ کی پٹی میں شہریوں کے خلاف مزید قتل عام کے ارتکاب کے لیے استعمال کر رہا ہے۔
حازم قاسم نے تمام ثالثوں سے مطالبہ کیا کہ وہ غزہ کی پٹی میں فلسطینی عوام کے خلاف قابض دشمن کی جارحیت کو روکنے، ان تجاوزات کا خاتمہ کرنے اور پٹی پر مسلط محاصرے کو فوری طور پر ختم کرانے کے لیے حرکت میں آئیں۔ انہوں نے اس بات پر زور دیا کہ پناہ گزینوں کے خیموں پر بمباری، خواتین کے قتل اور محاصرے کے تسلسل کے ذریعے قابض دشمن تمام عالمی قوانین اور انسانی اقدار کی دھجیاں اڑا رہا ہے۔
