مرکزاطلاعات فلسطین
قابض اسرائیلی فوج نے منگل کی علی الصبح مغربی کنارہ کے مختلف علاقوں میں بڑے پیمانے پر چھاپہ مار کارروائیوں اور حملوں کا آغاز کیا جس کے نتیجے میں درجنوں فلسطینیوں کو گرفتار کر لیا گیا، جن میں مزاحمت کے ساتھ ہونے والے تبادلے کے معاہدے کے تحت رہا ہونے والے متعدد اسیران بھی شامل ہیں۔
اس مہم کے دوران قابض دشمن نے درجنوں گھروں پر چھاپے مارے، تلاشی لی اور گھریلو سامان کی توڑ پھوڑ کی، جبکہ شہریوں کو وحشیانہ تشدد کا نشانہ بنانے کے بعد فیلڈ تحقیقات کے عمل سے گزارا گیا۔ اسی دوران غاصب آباد کاروں کی جانب سے فلسطینیوں اور ان کی املاک پر کیے گئے حملوں میں متعدد افراد کے زخمی ہونے کی اطلاعات بھی موصول ہوئی ہیں۔
کلب برائے اسیران نے اطلاع دی ہے کہ مغربی کنارہ کے شمالی شہر قلقیلہ میں حالیہ تبادلے کے معاہدے کے تحت رہا ہونے والے پانچ اسیران کو ان کے گھروں پر چھاپہ مار کر دوبارہ گرفتار کر لیا گیا ہے، جن میں سامح شوبکی، سائد الفايد، سعید ذياب، ابراہیم عطیہ اور ہادی جدوع شامل ہیں۔
علاوہ ازیں قابض افواج نے طولکرم کے شمال میں واقع قصبے دیر الغصون پر دھاوا بول کر نوجوان یوسف لقمان کو حراست میں لے لیا۔
اسی تناظر میں نابلوس میں شیخ خباب مروان الحمد کو ان کی رہائی کے چند ماہ بعد دوبارہ ان کے گھر سے گرفتار کر لیا گیا، جبکہ القدس روڈ پر چھاپے کے دوران رہائی پانے والےاسیر حمیدہ مرشود کو گرفتار کر کے ان کی گاڑی بھی قبضے میں لے لی گئی۔
گرفتار ہونے والوں میں نابلوس کے مغرب میں واقع العین کیمپ سے نوجوان نمر النادی اور شہر کے مشرق میں واقع گاؤں کفر قلیل سے فراس سمارہ بھی شامل ہیں۔ طولکرم کے جنوبی محلے میں گھر پر چھاپے کے دوران علی حسین سلمان عودہ کو بھی گرفتار کیا گیا۔
ان حملوں کے ساتھ ساتھ قابض یہودی آباد کاروں نے بھی اپنی سفاکیت کا مظاہرہ کیا اور نابلوس کے جنوب میں زعترہ چیک پوسٹ کے قریب فلسطینی گاڑیوں پر پتھراؤ کیا جس سے ایک گاڑی کے شیشے ٹوٹ گئے۔
ادھر بیتا نامی قصبے میں قابض افواج کے دھاوے کے بعد جھڑپیں شروع ہوئیں جہاں قابض دشمن نے گولیاں اور گیس کے گولے داغے، جس کے نتیجے میں ایک بچہ قابض فوجیوں کے تشدد اور مار پیٹ سے شدید زخمی ہوا۔
مقبوضہ بیت المقدس میں قابض فوج نے شعفاط کیمپ پر حملے کے دوران کیمپ کے شہداء کی یادگار کو مسمار کر دیا، اس بزدلانہ اقدام کو فلسطینی قومی علامات کو نشانہ بنانے کی مذموم کوشش قرار دیا گیا ہے۔
یہ تمام تر تبدیلیاں مغربی کنارے میں قابض افواج اور غاصب آباد کاروں کی جانب سے جاری حملوں، گرفتاریوں کی مہمات اور مکانات و تنصیبات کی مسماری و تخریب کاری کے بڑھتے ہوئے سلسلے کا تسلسل ہیں۔
غزہ کی پٹی پر جنگ کے آغاز سے اب تک مغربی کنارہ میں قابض اسرائیلی فوج اور غاصب آباد کاروں کے حملوں اور گرفتاریوں کی مہمات کے نتیجے میں 1133 فلسطینی شہید اور تقریباً 11 ہزار 700 زخمی ہو چکے ہیں۔
