مرکزاطلاعات فلسطین
مقبوضہ مغربی کنارے اور بیت المقدس کے مختلف علاقوں میں قابض اسرائیل کی افواج اور بزدل یہودی آبادکاروں کے حملوں کے نتیجے میں دو فلسطینی شہری زخمی ہو گئے جبکہ اس سفاکیت کے دوران الخلیل سے ایک لڑکی سمیت متعدد نوجوانوں کو گرفتار کر لیا گیا۔
مقامی ذرائع نے بتایا کہ ہفتے کی صبح کے وقت جنین کے جنوب میں واقع قصبے جبع میں ایک آبادکار نے اپنی زمین پر موجود فلسطینی شہری پر حملہ کر کے اسے زخمی کر دیا۔
علاوہ ازیں گذشتہ رات مقبوضہ بیت المقدس کے شمال میں واقع قصبے الرام میں قابض اسرائیل کی افواج کی فائرنگ سے ایک شہری زخمی ہوا۔
بیت المقدس کے ذرائع کے مطابق پچاس کی دہائی میں موجود اس شہری کو قابض دشمن کے ساتھ ہونے والی جھڑپوں کے دوران چہرے پر گولی ماری گئی اور ایک گولی اس کی آنکھ کے قریب جا لگی۔
ذرائع نے مزید بتایا کہ زخمی شہری کو ایک اسرائیلی ہسپتال منتقل کر دیا گیا ہے تاہم ابھی تک اس کی صحت کی صورتحال کے بارے میں کوئی معلومات فراہم نہیں کی گئیں۔
اسی طرح گذشتہ رات قابض اسرائیل کی افواج نے مقبوضہ القدس کے شمال مشرق میں واقع قصبے حزما پر دھاوا بولا اور تجارتی مراکز کے اندر آنسو گیس کے گولے پھینکے جس کے نتیجے میں دکانوں کو مادی نقصان پہنچا اور کئی دکانداروں کا دم گھٹنے لگا۔
الخلیل میں قابض اسرائیل کی افواج نے زحلیقہ کے علاقے میں محمد عواودہ کے گھر پر چھاپہ مارا اور توڑ پھوڑ کرنے کے بعد ان کی بیٹی براء محمد عواودہ کو گرفتار کر لیا۔
گذشتہ چند گھنٹوں کے دوران قابض اسرائیل کی افواج نے نابلس کے قصبے عصیرہ سے حربی جملان اور بیت لحم کے شمال میں واقع عایدہ کیمپ پر حملے کے دوران دو نوجوانوں یزن رزق زبون اور محمد ابو حماد کو بھی گرفتار کر کے قابض صہیونی عقوبت خانوں میں منتقل کر دیا۔
