نظم "مسجد اقصی”
ادا جعفری
ایسا اندھیرا تو پہلے نہ ھُوا تھا لوگو!
لو چراغوں کی تو ھم نے بھی لرزتے دیکھی
آندھیوں سے کبھی سُورج نہ بُجھا تھا لوگو!
آئینہ اتنا مَکدّر ھو کہ اپنا چہرہ
دیکھنا چاھیں تو اغیار کا دھوکا کھائیں
ریت کے ڈھیر پہ ھو محملِ اَرماں کا گماں
منزلیں کاسہء دریوزہ گری بن جائیں
قافلے لُٹتے ھی رھتے ھیں گزرگاھوں میں
لُوٹنے والوں نے کیا عزمِ سفر بھی لُوٹا؟
دَجلہء خوُں تو نئی بات نہیں ھے، یہ کہو
وہ جو ڈوُبا ھے، سفینہ ھے کہ ساحل ڈوبا
جادہء شوق ھے کہ مسجدِ اقصی پہلے
دل بھی قبلہ ھے، یہ قبلہ نہ ڈھہا تھا پہلے
نامناسب تو نہ تھا شعلہ بیاں بھی ھوتے
تم مگر شعلہ بہ دل، شعلہ بہ جاں بھی ھوتے
تم تو خورشید بکف تھے سرِ بازارِ وفا
کیوں حریفِ نگہِ چشمِ تماشا نہ ھُوئے
کِس کی جانب نگراں تھے کہ لگی ھے ٹھوکر
تم تو خوُد اپنے مُقدر کی عَناں تھامے تھے
اِس صحیفے میں ندامت کہیں مفہوُم نہ تھی
اِس خریطے میں ھزیمت کہیں مرقوُم نہ تھی
رَن سے آتے تھے تو باطبلِ ظفر آتے تھے
ورنہ نیزوں پہ سجائے ھُوئے سر جاتے تھے
مِٹ نہ پائے تھے بگوُلوں سے نقوُشِ کفِ پا
اِن رَھوں میں ھیں رسوُلوں کے نقوُشِ کفِ پا
محترم ھے مجھے اِس خاک کا ذرہ ذرہ
ھے یہاں سرورِ کونین کے سجدے کا نشاں
اِس ھَوا میں مِرے آقا کے نفس کی خوشبُو
اِس حَرم میں مِرے مولا کی سواری ٹھہری
اِس کی عظمت کی قسم اَرض و سما نے کھائی
تم نے کچھ قبلہء اوّل کے نگہبان! سُنا؟
حُرمتِ سجدہ گہہِ شاہ کا فرمان سُنا؟
زندگی مرگِ عزیزاں کی تو سَہہ جاتی ھے
مرگِ ناموُس مگر ھے وہ دھکتی بَھٹی
جس میں جل جائے تو خاکسترِ دل بھی نہ مِلے
اور تپ جائے تو کندن ھے وجودِ انساں
پھر یہ پِگھلے ھُوئے لمحاتِ کراں تا بہ کراں
آپ مینارہء انوار میں ڈھل جاتے ھیں
عرش سے خاک نشینوں کو سلام آتے ھیں
خار زاروں کو کِسی آبلہ پا کی ھے تلاش
وادیء گل سے ببوُلوں کا خریدار آئے
دلق پوش آئے، غلاموں کا جہاندار آئے
پا پیادہ کوئی پھر قافلہ سالار آئے
ریگ زاروں میں کوئی تشنہ دہن آ جائے
ہوش والو! کوئی تلقینِ جُنوں فرمائے
