مرکزاطلاعات فلسطین
برطانوی کرائے کے فوجی ڈیوڈ میکنٹوش کی جانب سے جاری کردہ ایک ویڈیو کلپ نے غزہ کی پٹی میں غذائی امداد کے منتظر نہتے فلسطینی شہریوں پر اسرائیلی فوجیوں کی براہ راست فائرنگ کے ہولناک مناظر ایک بار پھر تازہ کر دیے ہیں۔ یہ مناظر بھوک کے ستائے فلسطینیوں کے خلاف قابض اسرائیل کی وحشیانہ سفاکیت اور جنگی جرائم کا منہ بولتا ثبوت ہیں۔
میکنٹوش نے اپنے انسٹاگرام پیج پر جو ویڈیوز شیئر کی ہیں وہ اس وقت کی ہیں جب وہ "غزہ ہیومینیٹرین” نامی ادارے کے امدادی مراکز کی سکیورٹی پر مامور مشترکہ فورس کا حصہ تھا۔ ان ویڈیوز میں دیکھا جا سکتا ہے کہ اسرائیلی فوجی ٹینکوں پر سوار ہو کر ان شہریوں پر گولیاں برسا رہے ہیں جو امداد کے حصول کے لیے جمع ہوئے تھے۔ واضح رہے کہ ان مقامات پر امداد کے انتظار میں پہلے بھی سینکڑوں فلسطینی جامِ شہادت نوش کر چکے ہیں۔
برطانوی فوجی نے ان مناظر کو "انتہائی تکلیف دہ” قرار دیتے ہوئے بتایا کہ اس نے غزہ میں امریکی فوجیوں کے ساتھ مل کر ایک مشترکہ فورس کے تحت امدادی کاموں کی سکیورٹی کی ذمہ داریاں نبھائیں۔
اس نے مزید انکشاف کیا کہ امدادی مراکز پر تعینات مشترکہ فورس کے بعض ارکان کی کوششوں کے باوجود ان علاقوں کا گھیراؤ کرنے والی اسرائیلی فوج کی "سفاکیت میں کوئی کمی نہیں تھی” اور وہ کھلے عام شہریوں کو اپنی گولیوں کا نشانہ بناتے تھے۔
میکنٹوش کے مطابق یہ ویڈیوز ان مجبور فلسطینیوں کی بے بسی کی عکاسی کرتی ہیں جو اپنے خاندانوں کے لیے لقمہِ اجل تلاش کرنے ان خطرناک مقامات پر پہنچے تھے۔ اس نے اسرائیلی افواج پر امدادی کاموں کو سبوتاژ کرنے اور "جنگی جرائم” کے ارتکاب کا الزام بھی عائد کیا۔
یہ ویڈیوز سوشل میڈیا پر تیزی سے وائرل ہو رہی ہیں جہاں انسانی حقوق کے کارکنوں اور صارفین نے انہیں شیئر کرتے ہوئے "غزہ ہیومینیٹرین” نامی ادارے کے مراکز پر ہونے والی انسانی حقوق کی پامالیوں کو کڑی تنقید کا نشانہ بنایا ہے۔
متعدد صارفین نے ان ویڈیوز کو ان سابقہ گواہیوں سے جوڑا ہے جن میں بتایا گیا تھا کہ کس طرح خوراک کے حصول کی کوشش میں عام شہریوں کا قتلِ عام کیا گیا۔ ان کا کہنا ہے کہ بہت سے خاندانوں نے امداد کے انتظار میں اپنے پیاروں کو کھو دیا ہے۔
دیگر صارفین نے اپنے تبصروں میں لکھا کہ یہ مناظر غزہ کے محصورین پر مسلط کی گئی اس بدترین بھوک اور قحط کی عکاسی کرتے ہیں جو اس جنگ کا حصہ رہی ہے، جبکہ کچھ کا خیال ہے کہ یہ عالمی سطح پر ان مظالم پر گرفت نہ ہونے کا نتیجہ ہے۔
یاد رہے کہ قابض اسرائیل کی جانب سے قائم کردہ "غزہ ہیومینیٹرین” نامی ادارے نے سنہ مئی میں بین الاقوامی امدادی ایجنسیوں پر پابندیوں کے بعد امداد کی تقسیم کا کام سنبھالا تھا۔ تاہم اقوامِ متحدہ کے ماہرین اور انسانی حقوق کی تنظیموں نے اس طریقہ کار کو شدید تنقید کا نشانہ بناتے ہوئے اسے ناکافی اور شہریوں کی زندگیوں کے لیے خطرناک قرار دیا تھا۔
اس ادارے نے غزہ کی پٹی میں صرف چار امدادی مراکز قائم کیے تھے جبکہ اس کے مقابلے میں اقوامِ متحدہ کا نظام پہلے 400 مراکز کے ذریعے امداد پہنچاتا تھا۔ انسانی حقوق کے اداروں نے پہلے ہی خبردار کر دیا تھا کہ یہ محدود مراکز شہریوں کے لیے قتل گاہیں بن سکتے ہیں۔
غزہ میں حکومتی میڈیا آفس کے اعداد و شمار کے مطابق امدادی مراکز کے قریب یا اندر اسرائیلی فائرنگ اور بمباری سے اب تک تقریباً 1109 فلسطینی شہید ہو چکے ہیں جن میں 225 بچے 852 مرد و خواتین اور 32 معمر افراد شامل ہیں۔
اعداد و شمار یہ بھی بتاتے ہیں کہ دو سالہ جنگ کے دوران امداد کے انتظار میں شہید ہونے والوں کی کل تعداد 1506 ہو چکی ہے جبکہ 19 ہزار سے زائد زخمی ہوئے ہیں۔ "غزہ ہیومینیٹرین” کے مراکز کے قریب ہونے والے واقعات اس مجموعی جانی نقصان کا 73 فیصد حصہ ہیں۔
