مرکزاطلاعات فلسطین
قابض اسرائیل کی جانب سے سیز فائر معاہدے کی مسلسل خلاف ورزیوں کے نتیجے میں پیر کے روز غزہ کی پٹی میں اسرائیلی جارحیت کے باعث ایک فلسطینی شہری شہید اور متعدد زخمی ہو گئے ہیں۔
مقامی ذرائع نے اطلاع دی ہے کہ وسطی غزہ کی پٹی میں واقع البریج پناہ گزین کیمپ پر اسرائیلی فضائی حملے کے نتیجے میں انس خالد صافی نامی شہری شہید ہو گئے ہیں۔
علاوہ ازیں ہمارے نامہ نگار نے اطلاع دی ہے کہ آج صبح خان یونس میں ابو حمید چوک کے علاقے پر اسرائیلی فضائی حملے میں متعدد شہری زخمی ہوئے ہیں۔ اسی طرح قابض اسرائیل کی بکتر بند گاڑیوں نے خان یونس شہر کے مشرقی علاقوں میں بھی فائرنگ کی ہے۔
علاوہ ازیں غزہ شہر کے مغرب میں 17 نمبر چوک کے قریب اسرائیلی طیاروں نے شہریوں کے ایک گروہ کو نشانہ بنایا جس کے نتیجے میں متعدد افراد زخمی ہوئے ہیں۔
قابض اسرائیل کی افواج 10 اکتوبر سنہ 2025ء سے غزہ کی پٹی میں سیز فائر معاہدے کی مسلسل خلاف ورزی کر رہی ہیں۔ یہ خلاف ورزیاں پناہ گزینوں کے مراکز پر فضائی اور توپ خانے سے بمباری، یلو لائن کے اندر تعمیرات کو تباہ کرنے اور سامان، امداد اور سفر پر پابندیاں برقرار رکھنے کی صورت میں جاری ہیں۔
فلسطینی وزارت صحت کے اعداد و شمار کے مطابق 10 اکتوبر سنہ 2025ء کو سیز فائر کے آغاز سے اب تک شہداء کی تعداد 777 تک پہنچ گئی ہے جبکہ 2171 افراد زخمی ہوئے ہیں، اس کے علاوہ 761 لاشیں ملبے سے نکالی گئی ہیں۔
سات اکتوبر سنہ 2023ء سے اب تک جاری جارحیت کے نتیجے میں کل شہداء کی تعداد 72 ہزار 553 اور زخمیوں کی تعداد 1 لاکھ 72 ہزار 274 تک جا پہنچی ہے، جو غزہ کی پٹی پر مسلط اس جنگ کی بھاری انسانی قیمت کو ظاہر کرتی ہے۔
