مرکزاطلاعات فلسطین
غزہ کی پٹی پر مسلط غاصب صہیونی دشمن ریاست کی طرف سے فلسطینیوں کی نسل کشی اور خونی مہم جوئی کے خلاف عوامی غم و غصہ عروج پر پہنچ گیا ہے۔ ہفتے کے روز ہزاروں غیور شہریوں نے نم آنکھوں اور جذباتی ماحول میں اسلامی تحریکِ مزاحمت حماس کے عسکری ونگ القسام بریگیڈز کے کمانڈر عز الدین الحداد کے جسدِ خاکی کا تاریخی اور پُرشکوہ جنازہ اٹھایا، جو گذشتہ روز قابض اسرائیل کی ایک بزدلانہ ٹارگٹ کلنگ اور سفاکیت کے نتیجے میں اپنی شریکِ حیات اور معصوم بیٹی سمیت جامِ شہادت نوش کر گئے تھے۔
شہیدِ سعید کا یہ جنازہ وسطی غزہ شہر میں واقع شہداء الاقصیٰ مسجد سے روانہ ہوا، جہاں فضاء قابض اسرائیل کے خلاف شدید عوامی غیظ و غضب اور جہاد و مزاحمت کو جاری رکھنے، غاصب دشمن کے سامنے سیسہ پلائی دیوار بننے اور شہداء کے پاکیزہ خون اور ان کے خانوادوں سے آخری سانس تک وفاداری نبھانے کے پُرعزم اور فلک شگاف نعروں سے گونجتی رہی۔
خاندانی ذرائع نے اس دلدوز واقعے کی تصدیق کرتے ہوئے بتایا کہ کمانڈر عز الدین الحداد کو قابض اسرائیل نے ایک براہِ راست اور وحشیانہ فضائی حملے میں نشانہ بنایا تھا، جس کے نتیجے میں وہ اپنی وفادار بیوی اور لختِ جگر بیٹی سمیت موقع پر ہی شہید ہو گئے، یوں یہ پورا خوش نصیب خاندان اپنے ان دو بیٹوں سے جا ملا جو غزہ کی دھرتی پر برپا اس لامتناہی اور خونی جنگ کے دوران پہلے ہی مظلومیت کے ساتھ شہید ہو چکے تھے۔
اس ہولناک اور سنگدلانہ حملے کی تفصیلات کے مطابق وسطی غزہ شہر کے محلے الرمال میں ایک رہائشی عمارت اور ایک گاڑی پر قابض اسرائیل کی وحشیانہ بمباری کے نتیجے میں مجموعی طور پر شہید ہونے والے مظلوم فلسطینیوں کی تعداد بڑھ کر 8 ہو گئی ہے۔
یاد رہے کہ قابض اسرائیل نے گذشتہ روز باضابطہ طور پر کمانڈر عز الدین الحداد کو ٹارگٹ کلنگ کے ذریعے شہید کرنے کا اعتراف کیا تھا، جس کے بعد خاندانی ذرائع نے ان کی شہادت کی تصدیق کی اور آج غیور عوام کے ایک جمِ غفیر اور وسیع ترین عوامی شرکت کے ساتھ انہیں سپردِ خاک کر دیا گیا جو فلسطینیوں کے لازوال نصب العین اور آزادی کی منزل تک جدوجہد جاری رکھنے کا منہ بولتا ثبوت ہے۔
