مرکز اطلاعات فلسطین
فلسطینی وزارت صحت نے اعلان کیا ہے کہ غاصب دشمن کی مسلسل صیہونی جارحیت اور غزہ پٹی کے مختلف علاقوں میں قابض اسرائیل کی طرف سے کی جانے والی خلاف ورزیوں کے نتیجے میں گذشتہ اڑتالیس گھنٹوں کے دوران دو معصوم فلسطینی شہید اور 11 زخمی غزہ پٹی کے ہسپتالوں میں لائے گئے ہیں۔
وزارت صحت نے ایک پریس بیان میں وضاحت کی ہے کہ شدید زمینی خطرات اور مخدوش حالات کے باعث ایمبولینس عملے اور شہری دفاع کی ٹیموں کی وہاں تک رسائی ناممکن ہونے کی وجہ سے کئی مظلوم شہداء اور زخمیوں کے اجسام اب بھی تباہ شدہ عمارتوں کے ملبے تلے یا سڑکوں پر پڑے ہوئے ہیں۔
وزارت کے فراہم کردہ اعداد و شمار کے مطابق 11 اکتوبر سنہ 2025ء کو جنگ بندی کے نفاذ کے بعد سے اب تک شہداء کی کل تعداد بڑھ کر 983 ہو گئی ہے جبکہ 3122 افراد زخمی ہوئے ہیں اور اس دوران ملبے سے نکالی جانے والی لاشوں کی تعداد 783 تک پہنچ چکی ہے۔
وزارت صحت نے مزید بتایا کہ سات اکتوبر سنہ 2023ء سے غزہ پٹی پر قابض اسرائیل کی سفاکانہ جارحیت اور منظم نسل کشی کے آغاز سے اب تک شہداء کی مجموعی تعداد بڑھ کر 72,993 ہو گئی ہے اور 173,230 معصوم فلسطینی زخمی ہو چکے ہیں۔
وزارت نے اس بات پر زور دیا کہ قابض افواج کی جانب سے پرامن معاہدے اور جنگ بندی کی مسلسل سنگین خلاف ورزیوں کا سلسلہ جاری ہے جس میں نہتے فلسطینیوں پر براہِ راست فائرنگ، ہولناک توپ خانے اور فضائی بمباری سمیت سویلین تنصیبات کو دھماکوں سے اڑانے کی کارروائیاں شامل ہیں جس کے نتیجے میں روزانہ مزید معصوم فلسطینی شہید اور زخمی ہو رہے ہیں۔
یہ ہولناک حالات ایک ایسے وقت میں سامنے آ رہے ہیں جب غزہ پٹی کو غاصب صیہونی دشمن کی طرف سے پھیلائی گئی وسیع پیمانے پر تباہی، طبی امداد اور ریلیف فراہم کرنے کے شدید ترین چیلنجز کے درمیان انتہائی مخدوش انسانی اور معاشی صورتحال کا سامنا ہے۔
