اسرائیلی فضائیہ کے کمانڈر، میجر جنرل عمر تیشلر نے اپنی قیادت کو ایک مراسلہ بھیجا جس میں اس حملے کی تفصیلات پر روشنی ڈالی گئی ہے جو گزشتہ ہفتے ایران کے اندر مختلف اہداف کے خلاف کیا جانا طے تھا، تاہم آخری لمحات میں امریکی صدر ڈونلڈ ٹرمپ کی مداخلت سے اسے روک دیا گیا۔
منگل کے روز اسرائیلی براڈکاسٹنگ کارپوریشن "KAN 11” کی رپورٹ کے مطابق، تیشلر نے اپنے مراسلے میں واضح کیا کہ فضائیہ وسیع پیمانے پر بمباری کا مشن انجام دینے کے لیے مکمل طور پر تیار تھی، اور آپریشنل پلان کے تحت ایرانی حدود کے اندر گہرائی میں سینکڑوں اہداف کا تعین کر لیا گیا تھا۔
انہوں نے مزید کہا کہ ٹیک آف کے مقررہ وقت سے چند گھنٹے قبل، فضائی سکواڈرنز حتمی مشن کی تفصیلات سے آگاہ ہو رہے تھے کہ عمل درآمد سے محض ایک گھنٹہ قبل حملہ روکنے کا فیصلہ جاری کر دیا گیا۔
تیشلر نے اپنے خط میں مزید کہا کہ یہ حتمی طور پر کہنا قبل از وقت ہو گا کہ آئندہ مرحلے میں عالمی پیش رفت سیکیورٹی کی صورتحال پر کس طرح اثر انداز ہوں گی، تاہم انہوں نے اس بات کی طرف اشارہ کیا کہ (پچھلی) فوجی کارروائی نے ایران کے کمانڈ اینڈ کنٹرول اور عسکری ڈھانچے کو شدید نقصان پہنچایا تھا۔
انہوں نے واضح کیا کہ اس نقصان میں دفاعی اور جارحانہ نظام، جوہری پروگرام سے جڑے اجزاء، معیشت، کمانڈ چین اور تکنیکی مہارت، نیز فوج اور قومی صنعت شامل تھے۔
انہوں نے اس بات پر زور دیا کہ ان حملوں نے خطرے کی سطح کو نمایاں طور پر کم کرنے اور تعمیر نو کی مدت کو طویل کرنے میں کردار ادا کیا ہے، جبکہ ضرورت پڑنے پر ایران کے اندر کارروائیاں دوبارہ شروع کرنے کی صلاحیت کو بھی برقرار رکھا گیا ہے۔
عرب 48، 16/6/2026۔
