مرکز اطلاعات فلسطین
فلسطینی اسیران میڈیا آفس نے اس تلخ حقیقت کی تصدیق کی ہے کہ راکفیت قید خانے میں محبوس غزہ کی پٹی کے فلسطینی اسیران کو زمین دوز اور تنگ ترین اندھیری کوٹھڑیوں کے اندر مسلسل صیہونی جبر و ستم اور ہولناک تعذیب کا نشانہ بنایا جا رہا ہے اور وہ انتہائی ناگفتہ بہ اور سخت ترین انسانی و طبی حالات کا سامنا کر رہے ہیں۔
میڈیا آفس نے جاری کردہ اپنے ایک بیان میں واضح کیا ہے کہ غاصب صیہونی جلادوں اور تشدد پسند دستوں نے حال ہی میں شکاری کتوں، زہریلی گیس اور لاٹھیوں کا بے دریغ استعمال کرتے ہوئے اسیران کے ایک کمرے پر ہولناک دھاوا بولا جس کے نتیجے میں متعدد فلسطینی اسیران کی آنکھوں اور سروں پر شدید چوٹیں آئیں اور ان کے دانت ٹوٹ گئے جبکہ وحشیانہ تشدد کی وجہ سے کئی اسیران بے ہوش ہو گئے اور شدید اعصابی صدمے کا شکار ہو گئے۔
آفس نے مزید اشارہ کیا کہ قید خانے کی ظالم انتظامیہ اسیران کے خلاف مسلسل مجرمانہ اعتداءات کا ارتکاب کر رہی ہے جس میں انہیں بے رحمی سے مارنا پیٹنا، سنگین دھمکیاں دینا اور ان کی تذلیل کرنا شامل ہے۔ اس کے ساتھ ہی صیہونی انتظامیہ اسیران کی اپنے وکلاء کے ساتھ ہونے والی گفتگو کی خفیہ نگرانی اور جاسوسی کرتی ہے اور ان میں سے بعض کو اپنے خلاف دائر کردہ قانونی شکایات واپس لینے پر مجبور کرنے کے لیے سنگین ہتھکنڈے استعمال کر رہی ہے۔
میڈیا آفس نے بیان کیا کہ یہ مظلوم فلسطینی اسیران دانستہ طبی غفلت، خوراک اور لباس کی شدید قلت اور صفائی ستھرائی کے سامان کی عدم دستیابی کا شکار ہیں جبکہ دوسری طرف قید خانے کی متعصب صیہونی انتظامیہ نے ان پر سخت پابندیاں عائد کر رکھی ہیں اور انہیں قرآن پاک کے نسخے مہیا کرنے سے بھی مکمل طور پر روک رکھا ہے۔
اسیران میڈیا آفس نے عالمی انسانی حقوق کی تنظیموں اور بین الاقوامی اداروں سے پرزور مطالبہ کیا ہے کہ وہ غزہ کی پٹی کے ان مظلوم اسیران کے خلاف جاری صیہونی پامالیوں کو رکوانے کے لیے فوری اور ہنگامی مداخلت کریں اور راکفیت قید خانے کے اندر ڈھائے جانے والے ان ہولناک جنگی جرائم، تعذیب اور وحشیانہ جبر و ستم کی آزادانہ تحقیقات کا آغاز کریں۔
