اسرائیلی وزیراعظم بنجمن نتن یاہو نے اعتراف کیا ہے کہ حزب اللہ کے ڈرونز کا خطرہ بدستور شمالی علاقوں میں ایک نمایاں ترین سکیورٹی چیلنج بنا ہوا ہے۔ اس کے ساتھ ہی انہوں نے گلیل کے شہروں کی ترقی کے لیے ایک وسیع حکومتی منصوبے کا اعلان کیا ہے، جس میں بنیادی ڈھانچے، ٹرانسپورٹ، صحت اور تعلیم کے منصوبے شامل ہیں۔ ان کے بقول یہ خطے میں "سکیورٹی اور خوشحالی کی بحالی” کا حصہ ہے۔
نتن یاہو نے یہ بات نوف ہجلیل شہر میں جمعرات کو منعقد ہونے والے ایک خصوصی حکومتی اجلاس کے دوران کہی۔ انہوں نے کہا کہ اسرائیل حزب اللہ کو "بھرپور ضرب” لگا رہا ہے اور ڈرونز سمیت دیگر چیلنجز کا سامنا کر رہا ہے۔ انہوں نے مزید کہا: "ہم اس پر کام کر رہے ہیں اور ہم شمال میں ویسے ہی سکیورٹی بحال کریں گے جیسے ہم نے جنوب میں کیا ہے۔”
نتن یاہو نے سکیورٹی کی صورتحال کو حکومتی ترقیاتی منصوبوں سے جوڑتے ہوئے کہا کہ استحکام کی بحالی گلیل میں آبادی اور معاشی ترقی کی بنیادی شرط ہے۔ انہوں نے کہا کہ حکومت نے گزشتہ عرصے میں لبنانی سرحد سے 9 کلومیٹر تک واقع قصبوں اور مقبوضہ گولان کے لیے دسیوں ارب شیکل جاری کیے ہیں، اور فی الحال نوف ہجلیل، عکہ، کرمیئل، صفد، عفولہ، ناصرہ اور طبریا کے شہروں کے لیے ایک "بڑا پیکیج” تیار کر رہی ہے۔ انہوں نے مزید کہا کہ اس منصوبے میں اربن ڈیولپمنٹ، صنعتی زونز کی ترقی، ٹرانسپورٹ کے نیٹ ورکس، بنیادی ڈھانچے، اور صحت و تعلیم کی سہولیات شامل ہیں، جبکہ اخراجات کی ترجیحات طے کرنے اور منصوبوں پر عمل درآمد میں مقامی کونسلیں مرکزی کردار ادا کریں گی۔ (عرب 48، 12/6/2026)۔
