مرکزاطلاعات فلسطین
ایران کی پاسداران انقلاب فورس نے آبنائے ہرمز سے بغیر کسی ہم آہنگی کے گزرنے کی کوشش کرنے والے تین تجارتی بحری جہازوں کو نشانہ بنایا ہے، جو کہ اس اہم آبی گزرگاہ سے ہونے والی نقل و حرکت پر ایرانی کنٹرول کی واضح علامت ہے۔
فارس نیوز ایجنسی کے مطابق پاسداران انقلاب نے آج ان دو تجارتی بحری جہازوں کے خلاف کارروائی کی جنہوں نے بین الاقوامی قوانین کی خلاف ورزی کرتے ہوئے آبنائے ہرمز سے گزرنے کی کوشش کی تھی۔
دوسری جانب تسنیم نیوز ایجنسی نے ایرانی بحریہ کے حوالے سے رپورٹ دی ہے کہ فرانسسکا اور ایپامینوڈس نامی ان دو خلاف ورزی کرنے والے بحری جہازوں نے بحری سکیورٹی کو شدید خطرات سے دوچار کر دیا تھا۔
بعد ازاں فارس نیوز ایجنسی نے اس بات کی تصدیق کی کہ پاسداران انقلاب نے آج ایک تیسرے بحری جہاز ’ایفوریا‘ کو بھی نشانہ بنایا ہے، جو اس وقت ایران کے ساحلوں کے قریب پھنسا ہوا ہے۔
اس حوالے سے پاسداران انقلاب کی بحریہ نے سخت وارننگ جاری کرتے ہوئے کہا ہے کہ ان کی افواج آبنائے ہرمز میں نقل و حرکت کے حوالے سے قوانین کی خلاف ورزی کرنے والے کسی بھی اقدام کے خلاف قانونی اور انتہائی سخت کارروائی کریں گی۔
واضح رہے کہ ایران نے چند روز قبل ہی آبنائے ہرمز کو دوبارہ بند کر دیا تھا، یہ قدم امریکی افواج کی جانب سے ایرانی بندرگاہوں کے مسلسل بحری حصار کے ردعمل میں اٹھایا گیا ہے۔
