مرکز اطلاعات فلسطین
فلسطینی وزارت صحت نے غزہ کی پٹی پر قابض اسرائیل کی مسلسل جارحیت اور سفاکیت کے نتیجے میں گرتی ہوئی دیواروں تلے دبے معصوموں اور سڑکوں پر پڑے زخمیوں تک پہنچنے میں امدادی ٹیموں اور شہری دفاع کے عملے کی مسلسل بے بسی کے مابین شہداء اور زخمیوں کی تعداد میں ہولناک اضافے کا اعلان کیا ہے۔
وزارت صحت کی جانب سے جاری ہونے والی روزانہ کی شماریاتی رپورٹ کے مطابق گذشتہ چوبیس گھنٹوں کے دوران غزہ کی پٹی کے ہسپتالوں میں مزید 6 شہداء کی پاکیزہ لاشیں لائی گئیں جن میں دو نئے لاپتہ ہونے والے اور چار ایسے شہداء شامل ہیں جن کے اجسادِ خاکی کو ملبے تلے سے نکالا گیا ہے جبکہ اس کے ساتھ ہی مزید 34 فلسطینیوں کے شدید زخمی ہونے کا اندراج کیا گیا ہے۔
سرکاری اعداد و شمار کے مطابق دس اکتوبر کو سیز فائر (یا جنگ بندی) کے بعد سے اب تک صیہونی بربریت کے شکار مظلوموں کی مجموعی تعداد بڑھ کر 906 شہداء اور 2747 زخمیوں تک جا پہنچی ہے جبکہ ملبے کے نیچے سے نکالے جانے والے لاپتہ افراد کی تعداد 781 ہو گئی ہے۔
اسی تناظر میں سات اکتوبر سنہ 2023ء کو غاصب صیہونی دشمن کی طرف سے شروع کی جانے والی نسل کشی اور منظم جارحیت کے آغاز سے لے کر اب تک کی مجموعی اور لرزہ خیز تفصیلات بتاتے ہوئے وزارت صحت نے ریکارڈ کیا ہے کہ اس طویل مظلومیت کے دوران اب تک 72803 فلسطینی جامِ شہادت نوش کر چکے ہیں اور 172855 بے گناہ زخمی ہوئے ہیں۔
فلسطینی وزارت صحت نے اس سنگین صورتحال پر شدید تشویش کا اظہار کرتے ہوئے اس بات پر سخت زور دیا ہے کہ میدانِ جنگ کے انتہائی ابتر حالات اور بچاؤ کے کاموں میں رکاوٹ ڈالنے والی مسلسل صیہونی پابندیوں کے باعث شہداء اور زخمیوں کی ایک بڑی تعداد اب بھی تباہ شدہ مکانات کے ملبے تلے دب کر سسک رہی ہے اور وہ ایسے دور دراز علاقوں میں موجود ہے جہاں تک پہنچنا امدادی ٹیموں کے لیے انتہائی دشوار بنا دیا گیا ہے۔
