مرکزاطلاعات فلسطین
اسلامی تحریک مزاحمت ’حماس‘ نے کہا ہے کہ دہشت گرد قابض اسرائیلی فوج کے طیاروں کی جانب سے غزہ شہر کی شارع النفق پر پولیس کی گاڑی کو نشانہ بنانا، جس کے نتیجے میں ایک بچے سمیت چار شہری شہید ہوئے، غزہ کی پٹی میں ہمارے فلسطینی عوام کے خلاف جاری انسانیت سوز جرائم کا تسلسل ہے۔
حماس نے منگل کے روز جاری کردہ اپنے ایک بیان میں مزید کہا کہ یہ نشانہ بنانا اس بات کی پختہ دلیل ہے کہ جنگی مجرم بنجمن نیتن یاھو کی قیادت میں دہشت گرد قابض حکومت سیز فائر معاہدے پر عملدرآمد کی کوششوں کو ناکام بنانے کے اپنے مذموم اقدامات جاری رکھنے کا ارادہ رکھتی ہے۔
تحریک نے اس جانب اشارہ کیا کہ دہشت گرد قابض فوج کی جانب سے سول پولیس کے اہلکاروں کو نشانہ بنانے میں تیزی لانا دراصل صہیونی حکومت کی اس انتھک کوشش کا حصہ ہے جس کا مقصد غزہ کی پٹی میں افراتفری پھیلانا، سکیورٹی کے نظام کو کمزور کرنا اور ایجنٹ ملیشیاؤں کو ان کے ناپاک ایجنڈے کی تکمیل کا موقع فراہم کرنا ہے، لیکن ہمارے عوام اور ان کی مزاحمت پوری قوت کے ساتھ اس کا مقابلہ کریں گے۔
حماس نے سیز فائر معاہدے کی ضامن امریکی انتظامیہ اور برادر ثالث ممالک سے مطالبہ کیا ہے کہ وہ ہمارے عوام کے خلاف قابض اسرائیل کے مسلسل جرائم اور خلاف ورزیوں کو روکنے کے لیے اپنی ذمہ داریاں پوری کریں اور اسے معاہدے کی شرائط پر عمل کرنے کا پابند بنائیں۔ حماس نے عالمی برادری سے بھی مطالبہ کیا ہے کہ وہ قابض اسرائیل کے جرائم کی مذمت کرے، اسے سیاسی طور پر تنہا کرنے کے لیے کام کرے اور اس کے رہنماؤں کو ہمارے عوام اور انسانیت کے خلاف کیے جانے والے جرائم پر کٹہرے میں لائے۔
قبل ازیں، آج وزارت داخلہ نے اعلان کیا تھا کہ غزہ شہر میں التفاح اور الدرج پولیس اسٹیشن سے وابستہ پولیس کی ایک گاڑی پر قابض طیاروں کی بمباری کے نتیجے میں ایک پولیس افسر اور ایک بچے سمیت تین شہری شہید ہو گئے ہیں۔ یہ حملہ اس وقت کیا گیا جب پولیس اہلکار اپنی معمول کی ڈیوٹی پر مامور تھے، اس حملے میں پولیس اہلکاروں اور راہگیروں سمیت 9 افراد زخمی بھی ہوئے جن میں سے بعض کی حالت تشویشناک ہے۔
